بس تاج دسم جدا جدا جدا
شكلي كده حقعد اكتب فيه يومين
مدونه الروح bos bos التاج جالي من
لو قالولك اختارعصر من عصور مصر عشان تعيش فيه تختارى عصر وفى عهد اى حاكم واشمعنى؟
حختار عصر الرسول عليه الصلاه والسلام لانه فعلا افضل العصور
يمكن ساعتها كان حيكون ساعتها حسابنا اكبر لاننا كنا معاشرين الرسول عليه الصلاه والسلام فكان لازم نعمل بكل شيئ يقول عليه بس اكيد هو افضل العصور
اول اولوية فى حياتك عيلتك ولا شغلك ولا اصحابك؟
كل حاجه منهم ليها اولويه خاصه يعني العيله مهمه في حياتي ومقدرش اني مديهاش اولويه كمان الشغل انا لسه مشتغلتش بس لو مديتش شغلي اهميه يبقى مش بحبه يبقى ملوش لزمه بحياتي اصحابي بقى لو مهتمتش بيهم اكيد مستاهلش اني اكون صديقه ليهم ..... صعبه اني احدد حاجه منهم اني اديها اولويه لان كل حاجه مختصه بذاتها
ايه اكتر حاجة بتحبها فى رمضان
بحب كل حاجه في رمضان لمه الناس مع بعضها .. المسحراتي .. مدفع الفطار
كمان تدين الناس بس يارب كل واحد يفضل على طريقه اللي سلكه في رمضان
بجد رمضان كله على بعضه حاجه جميله جدا ياريت كل السنه تكون رمضان
اوصف ليا اجمل فطار ممكن تفطره؟
هو اكيد الفطار حيكون حلو لما يكون فيه ناس كتير
اينعم العزايم والحاجات دي بتكون صعبه شويه لان بعدها بنحس اننا تعبنا جدا من كتر الشيل والحط ونعمل ونغسل والحاجات دي بقى بس بجد بيكون يوم حلو اوي
انا كان نفسي فعلا اروح يوم افطر في الحسين ... سمعت من ناس كتير ان جو رمضان هناك بيكون حلو اوي .. كان نفسي اجرب رمضان هناك بس يلا متعوضه ان شاء
لو انت حاكم على مجموعة من الافراد حتكون عادل؟ طب حتعمل ايه عشان تتأكد انك حاكم عادل؟
اكيد ححاول بقدر المستطاع اني اكون عادله بينهم
علشان اتاكد اني عادله بينهم اكيد ححكم عقلي واسمع كل الاطراف واكون مع الحق
واكيد حستشيرهم معايا باموري مش معنى اني حاكم عليهم يبقى راي بس هو اللي يمشي لا طبعا لازم يكون فيه مشورى دايما بينا علشان نكون كلنا عادلين
اللى بيبوظ الحكام ..نفسهم ولا الشعب ولا الحاشية المقربة؟؟
هو سؤال صعب شويه بس هو ممكن كل حاجه
يعني الحكام هو من الاول لو تنشاتهم مش مظبوطه يبقى حيكون هما سبب البوظان
ممكن كمان لما يكون الشعب مش بايده حاجه يعملها او يكون مستسلم بيزيد البوظان
والحاشيه حتلاقي الحاكم بايظ يبقى اكيد حيساعدوه ياما حيطردوا
مين اكتر اعلامى مصرى بتحترمه؟؟
انا بحترم جدا عمرو اديب بتعجبني اراءه ومواجهته للامور
يعني بلاقيه انه بيقول اللي هو عايزه باسلوب كويس جدا بحيث ان محدش حيقدر يغلطه او يقوله انت غلطت في كذا
بجد بيعجبني اسلوبه في النقاش جدا
قريت ديوان عمر مصطفى صاحب بلوج تجربة" اسباب وجيهة للفرح" عن دار ملامح ولا لسه؟؟
صراحه مقراتهوش ولا سمعت عنه بس لو حد يجيب اللينك نقدر نقراه
لو ممكن تشتغل شغلانة تانية غير اللى انت بتشتغلهااو كنت بتشتغلها كنت تتمنى تبقى ايه؟؟
هو انا لسه بدرس مشتغلتش بس مفروض اني اتخرج اشتغل في الترجمه او السياحه
بس كان نفسي ادخل كليه اعلام واشتغل في الصحافه بعد كده بحس بجد انها شغل كويس اوي اينعم متعب حبتين بس حلو
ايه تانى بلد تتمنى تعيش فيها بعد مصر؟؟
بجد اكتر بلد كنت اتمنى اني اعيش فيها هي سوريا
بحب البلد دي جدا ونفسي ازورها ويارب اعيش فيها قريب :D
اوصف ليا ترتيبات اجمل فرح ممكن تحضره؟؟
طبعا اجمل فرح ممكن احضره حيكون فرح حد بحبه اوي ومن سني كمان
يعني من 3 شهور كانت خطوبه بنت خالتي هي اكبر مني بسنه واحده وكانت كمان الخطوبه حلوه جدا ..بعتبر ده من اجمل الافراح اللي حضرتها واكيد ان شاء الله ححضر افراح كتير لناس بحبهم
بتراعى كلام الناس والقيل والقال؟ لو اه او لو لا قولى ليه؟
هو اللي بيسمع كلام الناس دايما بيتعب لان محدش بيرحم حد
ودايما الناس بتتكلم على كل حاجه واللي ليها فيه واللي مالهاش فيه
مادام انا مقتنعه بان اللي بعمله صح يبقى مراعيش غير ربنا لان هو اللي حيحاسبني على اعمالي
صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة حتبقى سعيد؟
لا مش حكون سعيده مش فجاه كده الحياه تتغير بيا من غير اي مقدمات
فيه حاجات كتير بقت ضروريه بحياتنا ومينفعش اننا نرجع لعصر الحمام الزاجل
السعادة هى؟؟
السعاده مش ان كل حاجه تبقى عندي بس اعتقد ان السعاده اني اكون عايشه مع ناس بحبهم ووقت اما اكون عايزه احقق حاجه تتحققلي
فيه ناس كتير بتعتقد ان السعاده في الفلوس او تملك الاشياء
بالعكس فيه ناس كتير معاها فلوس كتيره جدا بس مش سعيده
يعني السعاده اني اكون مبسوطه بكل حاجه اعملها
عندك امل ؟ اسبابك ؟
الحمد لله عندي امل بس صراحه مش بنسبه كبيره لان فيه حاجات كتير بتمناها ومش بتحصل بس اكيد لازم يكون فيه امل ولو حتى بنسبه بسيطه علشان اقدر اقول اني عايشه
لما تحب تهرب من كل شىء بتروح فين؟؟
بروح للنوم وافضل ابكي كتير جدا لغايه اما بنام من كتر التعب
واوقات كتير لما بصحى بلاقي نفسي مستريحه وخلاص وبنسى اي مشكله حصلت لغايه اما تحصل حاجه تاني وتفكرني بيها
كنت بتمنى اني اكون في مدينه فيها بحر كنت ساعه اما اكون متضايقه اروح لواحدي على البحر واقعد اتكلم مع نفسي اكيد كنت حابقى مرتاحه اوي
امتى اول مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟
لا لسه محصلتليش يعني عمري مفكرت في مره اقول ياه ده انا كبرت
بس يمكن اقولها قريب
لما بتعمل عمل خيرى بيكون ايه هو دافعك الاول؟؟
اكيد ان ارضي ربنا واحاول ابسط حد محتاج كلمه كويسه على الاقل
بتشرب سجاير؟لو الاجابة اه ايه شعورك لو شفت ست بتشرب سجاير وليه؟
اكيد لا طبعا انا مش بطيق ريحتها اصلا
بتعرف ايدك اليمين من الشمال ازاى؟
انا من وانا صغيره بابا وماما علموني ان ايدي اليمين اللي باكل بيها واكتب بيها واشرب بيها يعني كل حاجه بيها
وايدي الشمال اللي بلبس فيها الساعه :D
ايه اكتر اله موسيقية بتحبها؟
بحب الجيتار اوي ونفسي اتعلم العزف عليه جدا
فى رأيك ليه الذوق والنخوة اتعدموا؟
يمكن بيرجع للتربيه انها خلاص اصبحت سيئه جدا بالنسبه لناس كتير معدوش بيهتموا بالتربيه اوي زي زمان
ويمكن كمان لان الشباب نفسهم بقوا فاضيين فمش عارفين يقضوا وقتهم ازاي فمعتش التربيه فارقه معاهم
ايه الحاجة اللى لو حصلتلك تبقى سعيد قوى؟
اكيد لو كل حاجه بتمناها اتحققت لي حكون سعيده جدا كمان
تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟
محبش يبقى عندي اي حاجه من دي اهم حاجه ان ربنا يكون راضي عندي ويحققلي كل اللي بتمناه
البحر ولا النيل؟؟؟
انا بحب الاتنين بس بحب البحر اكتر وخاصه وقت الغروب والشمس وهي نازله في البحر بجد احساسها حلو اوي
مركب ولا طيارة؟
انا بحب المركب كمان اوي بس نفسي اركب طياره واجرب احساس الطيران ده فحختار الطياره علشان اسافر الى احب بلد الى قلبي :D
عاقل ولا مجنون؟
الاتنين حلوين اوقات احب اكون عاقله واوقات نفسي اكون مجنونه
تقرا كتاب ولا تتفرج على فيلم؟
على حسب نوع الكتابه يعني لو من الانواع اللي بحبها يبقى اكيد كتاب
بتمرر التاج لمين؟؟
ممممممممم بجد صعب لان يمكن معرفش مدونين كتير واغلبهم راحل ليهم التاج
حمرره الى
نسيم الجنه
My Dreams
مواطن زهقان
مهبول ومهبوله
لو اي حد عايز التاج يتفضله مش حبخل على حد ;
بس مش معقول خلصت اخيرا 3 ايام بكتب فيه
